Presidentja e vendit, Vjosa Osmani, ka caktuar 28 dhjetorin si datë kur pritet të mbahen zgjedhjet e jashtëzakonshme parlamentare.
Caktimi i kësaj date u shoqërua me reagime të shumta pasi data 28 ishte një propozim i Lëvizjes Vetëvendosje.
Në lidhje me procesin e ri zgjedhor, datën e zgjedhjeve dhe rezultatet që presin si PDK, ka folur për “Gazeta Blic” ish-deputeti dhe zyrtari i kësaj aprtie, Hisen Berisha.
Berisha tha se vendi në këto momente ka nevojë për qartësi dhe stabilitet.
Ai potencoi se ‘demokracia funksionon vetëm atëherë kur qytetarëve u jepet mundësia t’i përcaktojnë institucionet me votë të lirë’.
“Vendi ka nevojë për qartësi dhe stabilitet. Demokracia funksionon vetëm atëherë kur qytetarëve u jepet mundësia t’i përcaktojnë institucionet me votë të lirë” deklaroi Berisha.
Berisha tha se sa i përket ndryshimit në krye të PDK-së, një ndryshim i tillë ka sjellë energji të re, frymë bashkimi dhe qartësi strategjike.
Ish-deputeti Berisha tha se në zgjedhjet e ardhshme presin një ngritje të qëndrueshme dhe një rikthim të PDK-së is forcë udhëheqëse.
“Sa i përket PDK-së, ndryshimi në krye të partisë ka sjellë energji të re, frymë bashkimi dhe qartësi strategjike. Kjo ndjehet në terren, në komunikim dhe në besimin e shtuar të njerëzve. Nuk presim mrekulli, por presim një ngritje të qëndrueshme, një rikthim të PDK-së si forcë udhëheqëse, të matur dhe përgjegjëse. Ne do të hyjmë në zgjedhje me bindjen se qytetarët e shohin PDK-në si alternativën serioze për t’i rikthyer vendit normalitetin institucional dhe perspektivën e zhvillimit” tha Berisha në përgjigjen e dhënë për “Gazeta Blic”.
/Gazeta Blic/
