Bayern Munich është në kërkim të një portieri të ri.

Manuel Neuer ka humbur pjesën e mbetur të sezonit pasi pësoi një frakturë të tibisë gjatë skijimit. Një pakujdesi e vërtetë e portierit gjerman që lë ekipin e tij duke kërkuar urgjentisht në treg për të gjetur një zëvendësues, përcjell GazetaBlic Sport.

Fliten disa emra. Por L’Équipe nxjerr në pah atë të Dominik Livakovic. Heroi i Kroacisë në Botërorin e Katarit është kthyer në një nga figurat e turneut. Ndaj nuk ka vonuar shumë për t’u vendosur në planet e një prej klubeve më të rëndësishme në Evropë.

Bayern dëshiron një zëvendësim për të dëmtuarin Neuer dhe Livakovic është i përshtatshëm. Mbështetësi kryesor për ardhjen e tij në Allianz Arena është Oliver Kahn. Drejtori i Përgjithshëm i skuadrës së Mynihut, një nga portierët më të mirë në historinë e futbollit, nuk kishte asnjë dyshim kur e mendoi atë si opsionin e preferuar kur mësoi për lëndimin e Manuel Neuer.

Gazeta franceze e lartpërmendur thekson në informacionin e saj se Dinamo Zagreb, klubi të cilit i përkasin të drejtat e portierit kroat, do të ishte i kënaqur në rast të ndonjë oferte të mirë.

Portieri ka një kontratë me skuadrën deri në qershor të vitit 2024, por mund ta lërë atë tashmë në afatin kalimtar të dimrit.

/GazetaBlic Sport/