Policia e Kosovës në bashkëpunim me autoritetet ndërkombëtare ka zhvilluar një operacion të bastisjeve në katër lokacione, që ka çuar në arrestimin e dy personave.

Tutje, në komunikatën e Gjykatës Themelore në Prishtinë dërguar mediave thuhet se gjatë bastisjes në lokacionet në fjalë janë sekuestruar vetura, kontrata e dokumenta të tjera përcjellëse, përcjell GazetaBlic.

Më poshtë edhe komunikata e plotë.

Parandalimi dhe luftimi i kriminalitetit në vend mbetet prioritet i autoriteteve zbatuese të ligjit dhe në këtë kontekst, Policia e Kosovës në funksion të bashkëpunimit ndërkombëtar për zbatimin e ligjit më datë 14.09.2021 ka zhvilluar një operacion të bastisjeve në katër lokacione, tri në regjionin e Gjakovës dhe një në regjionin e Prishtinës.

Operacioni është zhvilluar me urdhëresë të gjykatës Themelore në Prishtinë/Departamenti Special, pas kërkesës së pranuara nga autoritete policore të shtetit të Zvicrës, në bashkëveprim me një ekip hetuesish dhe një prokuror nga Shteti i Zvicrës, nëpërmes ndihmës juridike ndërkombëtare.

Në rajonin e Gjakovës janë bastisur dy shtëpi me objekte përcjellëse dhe një zyre projektuese, ndërsa në Prishtinë është bastisur një banesë.

Gjatë bastisjes është arritur të sekuestrohen dokumente të ndryshme si: kontrata, fatura dhe dokumentacione tjera përcjellëse.

Në këtë rast është sekuestruar edhe një veturë e tipit Merecedes me targa vendore pronë e të dyshuarit H.B. (1957)Gjykata kompetente në lidhje me rastin ka shqiptuar masën për parandalimin e shitjes së pronave (dy shtëpive dhe një banesë) dhe ngrirjen e llogarive bankare të të dyshuarave.

Dy persona, H.B. dhe A.B janë të dyshuar për veprat penale ”Pastrim i Parave”, “Mashtrim” dhe “Falsifikimi i Dokumenteve“ bazuar në legjislacion penal të shtetit të Zvicrës dhe rasti është duke u hetuar nga Drejtoria për Hetimin e Krimeve Ekonomike dhe Korrupsionit.

/GazetaBlic/