Kryetari i komunës, Agim Bahtiri, së bashku me zv.ministrin e Ministrisë së Infrastrukturës, Hysen Durmishi, kanë inspektuar punimet që po zhvillohen në asfaltimin e rrugës Melenicë- Zabërxhë të Mitrovicës.

Gjatë inspektimit të punimeve, kryetari Bahtiri së bashku me zv. Ministrin e kësaj ministrie janë shprehur të kënaqur me punimet e kryera përgjatë kësaj rruge e cila është pothuajse në përfundim të asfaltimit.

Ky projekt është mirëpritur shumë nga banorët e fshatrave të lartëpërmendura, ku kjo rrugë e cila është në përfundim të asfaltimit ka një gjatësi prej 6 kilometra e 300 metra dhe është mbështetur financiarisht nga Ministria e Infrastrukturës.

Po ashtu kryetari Bahtiri ka biseduar me zv ministrin Durmishi për përkrahjen edhe të disa projekte tjera në bashkëfinancim me komunën siç është asfaltimi i rrugës për në fshatin Selac, asfaltimin e rrugës në fshatrat Batahir, Magjerë, Dedi, Bistricë dhe Cerajë, si dhe rregullimi i ndriçimit publik dhe trotuarit në Koshtovë, dhe rregullimin e një nënkalimi tek shkolla në Zhabar.