Policia e Kosovës ka arrestuar një person nën dyshimin për trafikim me emigrantë, raporton Gazeta Blic.

Ngjarja ka ndodhur në fshatin Milloshevë të Obiliqit, ku është ndaluar një autobus me targa vendor që drejtohet nga një mashkull kosovar dhe në bord kishte 57 shtetas të huaj, të cilët ishin nga Siria,  Egjipti, Iraku, Palestina dhe nga Bangladeshi.

Postimi i plotë:

Arrestohet një i dyshuar për ‘trafikim me emigrantë’

Prishtinë, 2 qershor 2022

Në fshatin Milloshevë të Obiliqit, më 01.06.2022 rreth orës 22:00, është ndaluar për kontrollim nga zyrtarët policorë të Njësisë së Trafikut Regjional të Prishtinës një autobus. Autobusi me targa vendore dhe me drejtues S.U., (viti i lindjes 1988, mashkull kosovar), kishte në bord 57 shtetas të huaj (48 nga Siria, 5 nga Egjipti, 2 nga Iraku, 1 nga Palestina dhe 1 nga Bangladeshi).

Dyshohet se shtetasit e huaj kishin ardhur përmes rrugëve ilegale nga Turqia dhe synim të mbërritjes kishin shtetet e perëndimit. Rasti, emigrantët janë trajtuar nga zyrtarë policorë nga Drejtoria për Migrim dhe të Huaj dhe të njëjtit janë dërguar në Qendrën e Azilit në Magure.

Për rastin është njoftuar prokurori kujdestar dhe në koordinim me të ndaj drejtuesit të autobusit është iniciuar rasti ‘kontrabanda me emigrantë’. I dyshuari është intervistuar në prani të avokatit mbrojtës dhe më pas me aktvendim nga prokurori i njëjti dërgohet në mbajtje për 48 orë.