Një person i dyshuar është arrestuar sot në fshatin Llapushnik të Drenasit, nën dyshimin për asgjësim ose dëmtim të pasurisë dhe armëmbajtje pa leje.

Aksioni policor, i zhvilluar rreth orës 07:00, përfshiu edhe kontrollin e shtëpisë së personit të dyshuar, ku hetuesit gjetën dhe sekuestruan tri armë zjarri.

I dyshuari, Z.Th., mashkull, 73 vjeç, dyshohet se ka dëmtuar orendi në tri shtëpi të ndryshme. Ai është duke u intervistuar nga autoritetet, ndërsa hetuesit policorë, në koordinim me Prokurorin e shtetit, po vazhdojnë veprimet procedurale të nevojshme.

Policia e Kosovës njofton se aksioni u zhvillua në përputhje me ligjin dhe se hetimet për rastin po vazhdojnë.