Real Madrid nuk gaboi ndaj Getafes në transfertë duke triumfuar me shifrat 2-0, fitore që i rikthen kryeqytetasit në krye të renditjes. Heroi i madrilenëve në këtë sfidë ishte sulmuesi Joselu që realizoi të dy golat, nga një për çdo pjesë.
Pas takimit, trajneri Carlo Ancelotti nuk i kurseu elozhet për 33-vjeçarin me italianin që theksoi se Joselu po bën maksimumin që të qëndrojë te Real Madrid të paktën edhe për sezonin e ardhshëm.
“Ishte një ndeshje e bukur dhe jam i kënaqur për mënyrën si shkoi. Getafe është një kundërshtar i sikletshëm sepse dërgon shumë topa në zonë dhe preferon duelet fizike. Por, ne kemi lojtarë shumë të fortë fizikisht. Joselu për Realin është një beikm sepse ka cilësi ndryshe nga pjesa tjetër e futbollistëve.
Po bën gjithçka është e mundur që të qëndrojë te Reali edhe sezonin tjetër. Në mendimin tim sezoni i tij është spektakolar deri në këtë moment dhe jemi shumë të lumtur me të. Ai është një person shumë i përulur dhe është gjithnjë gati kur skuadra ka nevojë”, u shpreh Ancelotti.
