Anëtari i PSD-së, Bardh Ahmeti thotë se me lirimin e policëve kosovarë të kidnapuar nga Serbia, jemi futur në një proces deeskalimi që sipas tij nënkuptohet tërheqja e policisë nga veriu i Kosovës e mbajtja e zgjedhjeve të reja.

Ahmeti në një prononcim për GazetaBlic thotë se këtu vlen të theksohet toni më bashkëpunues i Bashkësisë Ndërkombëtare.

“Është e qartë që jemi futur një procesi de-eskalimi që sigurisht nënkupton tërheqjen e policisë nga veriu i Kosovës e mbajtja e zgjedhjeve të reja. Këtë mund ta shohim nga gjuha e bashkësisë ndërkombëtare që ka marrë një ton shumë më bashkëpunues”, tha Ahmeti.

Ahmeti shton se nga gjithë kjo situatë e tensionuar, formimi i Asociacionit është qëllimi final.

“Në këtë mes duhet ta bëjmë pyetjen “Çfarë ka fituar Kosova nga ky proces?”. E kjo pyetje, sigurisht, e hap rrugën për rezultatin e vërtetë që gjithë ky tension ka prodhuar, Asociacionin, që është edhe qëllimi final i marrëveshjes së Ohrit”, tha ai për GazetaBlic.

Kujtojmë se, Gjykata në Kralevë ka marrë vendim për lirimin e tre policëve të Kosovës që ishin rrëmbyer nga forcat serbe me 14 qershor.

Rifat Zeka, Beqir Sefi e Mustafë Shemi, ishin arrestuar më 14 qershor.

Policia derisa kishte konfirmuar arrestimin e tyre nga forcat serbe kishte thënë se “njësia policore patrulluese e kufirit ka qenë me detyre në pikë statike në vendin e quajtur Tresave/Bare, thellë brenda në territorin e Republikës së Kosovës, për të parandaluar shfrytëzimin e rrugëve ilegale, të cilat shfrytëzoheshin nga grupet kriminale për kalim ilegal dhe kontrabandë”.

Arrestimi i tre policëve kishte nxitur reagime të shumta në vend, ku u kërkua lirimi i menjëhershëm dhe pa kushte.

Lirimin e tre policëve e kanë kërkuar Bashkimi Evropian dhe Shtetet e Bashkuara të Amerikës.