Deputeti nga Lëvizja Vetëvendosje, Gramos Agusholli, ka reaguar pas akuzave të PDK-së se Qeveria Kurti është e përfshirë në afera korruptive.
Agusholli në një prononcim për Gazeta Blic, tha se nuk është e drejtë që të akuzohet qeveria për qeverisje korruptive.
“Sa i përket qeverisjes korruptive, nuk është e drejtë të akuzohet qeveria për këtë problem. Organizatat ndërkombëtare dhe raportet e progresit europian kanë vlerësuar Kosovën pozitivisht në tre vitet e fundit në aspektin e qeverisjes”, tha Agusholli.
Tutje ai thotë se edhe pse ka pasur individë të akuzuar për krim dhe korrupsion, por shton ai, kjo nuk e bënë të gjithë qeverisjen korruptive.
“Megjithatë, kjo nuk do të thotë se problemi është zgjidhur plotësisht. Qëndrimi në pushtet dhe mbledhja e shumë votave mund të sjellë njerëz që lidhen me pushtetin, e cila mund të bëjë menaxhimin e situaten më të vështirë. Edhe pse ka pasur individë të akuzuar për krime dhe korrupsion, kjo nuk e bën të gjithë qeverisjen korruptive”, u shpreh ai.
Agusholli thekson se është e rëndësishme që të punohet kundër krimit të organizuar dhe korrupsionit, në mënyrë që të shtohet transparenca në qeverisje.
“Është e rëndësishme të vazhdojmë të punojmë për të përmirësuar situatën, duke luftuar kundër krimit të organizuar dhe korrupsionit dhe duke shtuar transparencën dhe llogaridhënien në qeverisje” përfundoi ai për Gazeta Blic.
