Kandidati për deputet nga LDK, Lumir Abdixhiku, ka reaguar lidhur me rezultatin zgjedhor dhe diskutimet për koalicionet e mundshme paszgjedhore, raporton Gazeta Blic.

Ai ka thënë se ka dashur të pres numërimin e votave por që helmi e vreri politik e bënë të pamundur pritjen, teksa ka shtuar se KQZ s’po arrin ta bëjë gjënë bazike, numërimin e votave.

Ai ka thënë se LDK do t’i arrijë rreth 20 për qind, që LDK nuk ka fituar zgjedhjet por është rezultat i mirë pas rënies historike.

“Pavarësisht të gjithave, siç e thash në Konferencën e natës së zgjedhjeve, ky rezultati nuk është rezultat ndryshimi për Kosovën; sepse populli i Kosovës ka tjera preferenca. I respektojmë.  Do t’i respektoj këto preferenca sepse nuk di ndryshe! Qëndrimet e mia e të LDK-së paraelektorale mbeten edhe zotime të sotme. Le të mësohemi me një politikë ku mbajtja e fjalëve është standard bazik e ku marrja e pushtetit me çdo kusht nuk është qëllim”, ka shkruar ai.

Postimi i tij i plotë:

Të dashur mbështetës,

Vërtetë doja të prisja numërimin e rezultateve – edhe plot 100 mijë votave të tjera – para se të nisnim diskutimin paszgjedhor; por në gjithë helmim e vrerin politik të tanishëm edhe pritja e një gjëje bazike duket e pamundur.

Përveç kësaj, kemi dhe një KQZ që as edhe një gjë bazike për të cilën kishte kohë plot 4 vjet të përgatitet – si numërimi i votave – nuk arrinë ta bëjë. Kthehuni në metodë klasike aman! Numërim është ky!

Tani, sa i përket rezultatit.

Po, LDK do t’i ketë në fund plot 180 mijë vota.

Po, LDK do ta arrijë rreth 20%.

Po, ky është rezultat i mirë pas rënies historike.

Kokën lartë secili!

E rëndësishme që kemi rigjetur njëri tjetrin, jemi kthyer në bazë. E rëndësishme që kemi rikthyer veten në numrat tanë historik. Kjo është baza jonë!

LDK nuk i ka fituar zgjedhjet, do të donim këtë në veçanti ne, këtë e dijmë, por LDK pritet ti shtojë plot 80 mijë vota; e kapërcimi prej 12 në 20% do të vërtetohet si arritje e jashtëzakonshme. Prisni pak ditë. Ne nuk e kemi nisur garën as me 50% as me 20%. Ishim vetëm 12%! Sot, mbështetemi në qytetarinë që na jep edhe qetësi edhe shtytje për rrugëtimin e ri!

Pavarësisht të gjithave, siç e thash në Konferencën e natës së zgjedhjeve, ky rezultati nuk është rezultat ndryshimi për Kosovën; sepse populli i Kosovës ka tjera preferenca. I respektojmë.

Do t’i respektoj këto preferenca sepse nuk di ndryshe! Qëndrimet e mia e të LDK-së paraelektorale mbeten edhe zotime të sotme. Le të mësohemi me një politikë ku mbajtja e fjalëve është standard bazik e ku marrja e pushtetit me çdo kusht nuk është qëllim!

Gjithsesi, për të gjitha këto do të vendosim si një!

LDK është shtëpi e demokracisë!

Le të presim numërimet!

Le të ecim drejtë e siç dijmë ne!

Dritë do të ketë sërish!