Emri i Edon Zhegrovës është lidhur me një kalim të mundshëm tek skuadra e Napolit.

Sulmuesi kosovar ka shkëlqyer me paraqitjet tek skuadra e Lille dhe tashmë duket se do të bëjë hapin e madh në karrierë.

Largimi i Khvicha Kvaratskhelia u pa si një mundësi ideale që Zhegrova të jetë transferi i ri tek skuadra italiane, por duket se ai nuk është prioriteti kryesor, gjë e cila mund të ndryshojë.

Gazetari shumë i afërt me skuadrën e Napolit, Salvatore Amoroso, në një përgjigj ekskluzive për ‘GazetaBlic Sport’ tha se Zhegrova është një opsion, madje që nga vera e kaluar, por jo i pari në listën e ngushtë.

“Ai është një nga lojtarët që Napoli po shqyrton, por jo i pari në listën e ngushtë të Manna dhe Conte. Në këtë moment gjithçka është e mundur sepse ka shumë negociata në vazhdim dhe Edoni ishte në listën e Napolit edhe verën e kaluar. Me sa mund t’ju them, sot, Edoni është vetëm një mundësi, por jo zgjedhja e parë, edhe nëse agjenti i tij është në marrëdhënie shumë të mira me bordin e Napolit”, ka deklaruar gazetari Amoroso.

Do të mbetet të shihet se a mund të ketë ndonjë marrëveshje përfundimtare mes palëve, gjë që do të ishte një vendim i madh për Zhegrovën.

/GazetaBlic Sport/