Ish-futbollisti i Serie A, Lilian Thuram, ka thënë se Jose Mourinho është bërë një “burrë i vogël” duke minimizuar abuzimin e dyshuar racist drejtuar Vinicius Junior.
Ndeshja e play-off-it të Ligës së Kampionëve midis Real Madridit dhe Benficës në Portugali u njollos nga një situatë në të cilën Gianluca Prestianni duket se e ofendoi brazilianin në mënyrë raciste.
Lojtari i Benfica-s i mohoi akuzat, dhe Mourinho e mbrojti atë pas ndeshjes dhe duket se fajësoi Vinicius Junior.
“I thashë: ‘Kur shënon një gol të tillë, thjesht feston dhe kthehesh mbrapsht.’ Ata (Vinicius dhe Prestiani) më thanë gjëra të ndryshme. Por unë nuk zgjedh një anë. Dua të jem i pavarur”, tha Mourinho.
Thuram reagoi duke kritikuar Mourinhon.
“Natyra e deklaratave të tij shpjegon arsyet pse nuk po bëhet përparim. Mourinho është një trajner i shkëlqyer me një karrierë të jashtëzakonshme”, tha Thuram.
“Ai ka punuar me shumë lojtarë me ngjyrë, por kjo nuk e pengon atë, së pari, të dyshojë në natyrën e aktit racist dhe, së dyti, të vërë në pikëpyetje përgjegjësinë e viktimës. Vinicius, në këtë rast, për shkak të mënyrës se si feston një gol. Si mund ta thotë diçka të tillë? Kush është Mourinho për të vendosur se çfarë mund dhe nuk mund të bëjë Vinicius? Ekziston një ndjenjë superioriteti dhe narcizmi në gjykimin e Mourinhos. Akti racist kundër Vinicius nuk lidhej me sjelljen e tij, por me ngjyrën e lëkurës së tij”, vazhdoi legjenda franceze.
“Është për të ardhur keq që Mourinho po jep përshtypjen se Vinicius është përgjegjës për racizmin ndaj të cilit është i nënshtruar”, shtoi ai.
“Në këtë mënyrë, ai bëhet një burrë i vogël. Për sa kohë që një sjellje e tillë vazhdon, ne nuk do të përparojmë së bashku në këtë luftë, dhe kjo është gjithashtu pjesë e historisë së racizmit”, shtoi Thuram.
/GazetaBlic Sport
