Presidenti i Francës, Emmanuel Macron tha në Konferencën e Sigurisë në Mynih se Evropa duhet ta kthejë fokusin e saj në të menduarit strategjik afatgjatë.
Kjo thekson ai, bëhet duke përfshirë krijimin e aftësive për sulme të thella dhe vlerësimin se si parandaluesi bërthamor i Francës mund të përshtatet në arkitekturën e ardhshme të sigurisë së bllokut.
Presidenti Macron hodhi poshtë akuzat se Evropa po dekompozohej dhe mbrojti përpjekjen e saj për të luftuar dezinformimin dhe teprimet e mediave sociale që po dëmtonin demokracitë perëndimore.
“Kjo është koha e duhur për guxim. Kjo është koha e duhur për një Evropë të fortë.Evropa duhet të mësojë të bëhet një fuqi gjeopolitike. Nuk ishte pjesë e ADN-së sonë. Të gjithë duhet të marrin shembull nga ne, në vend që të na kritikojnë, tha ai.
Macron, i cili pritet të hyjë në vitin e tij të fundit në detyrë, tha se Evropa do të përballet ende me një Rusi agresive edhe nëse do të kishte një marrëveshje për luftën në Ukrainë dhe se nuk mund t’i nënshtrohej kërkesave ruse ose të lejonte një marrëveshje afatshkurtër që nuk do të zgjidhte çështjet thelbësore.
“Evropianët duhet ta fillojnë këtë punë me mendimin dhe interesat e tyre. Pra, propozimi im sot është të nisim një seri konsultimesh mbi këtë çështje të rëndësishme, të cilën kemi filluar ta përpunojmë me kolegët tanë britanikë dhe gjermanë, por në konsultimin më të gjerë evropian me të gjithë kolegët këtu, me shumë kapacitete, shumë mendim strategjik”, tha Macron.
“Duhet të riorganizojmë arkitekturën tonë të sigurisë në Evropë. Sepse arkitektura e kaluar e sigurisë ishte projektuar dhe përshtatur plotësisht gjatë kohës së Luftës së Ftohtë . Pra, nuk është më e adaptuar. Ne duhet ta riartikulojmë frenimin bërthamor në këtë qasje. Dhe kjo është arsyeja pse po e konceptojmë, dhe pas disa javësh do ta detajoj këtë, por ne kemi angazhuar një dialog strategjik, natyrisht me Kancelarin Merz, por edhe me disa udhëheqës evropianë, për të parë se si mund ta artikulojmë doktrinën tonë kombëtare, e cila garantohet dhe kontrollohet nga Kushtetuta”, tha ai.
