William Walker, në një intervistë për Kosova Live në T7, ka folur hapur për raportin e tij me ish-presidentin Hashim Thaçi dhe për kritikat që i kishte bërë qeverisjes së tij.

Ai ka theksuar se deri relativisht vonë, rreth dhjetë vjet më parë, ka qenë shumë kritik ndaj Hashim Thaçit dhe qeverisë së atëhershme. Sipas Walkerit, arsyet e kritikave lidhen me historitë e shumta për korrupsion, jo domosdoshmërisht ndaj Thaçit personalisht, por ndaj qeverisë dhe disa ministrive, si dhe me mungesën e bashkëpunimit me partitë dhe politikanët e tjerë.

Walker ka shtuar se kishte vërejtje edhe për lëshimet e shumta që, sipas tij, po bëheshin ndaj kërkesave të Bashkimit Evropian dhe Shteteve të Bashkuara të Amerikës, duke nënvizuar se në atë periudhë kishte qenë veçanërisht kritik.

Ai ka treguar se vetëm vite më vonë, rreth dhjetë vjet më parë, Hashim Thaçi i kishte sqaruar se nuk ishte i zemëruar me kritikat e tij, pasi e kuptonte se ato kishin për qëllim përmirësimin e gjërave për Kosovën. Sipas Walkerit, Thaçi e kishte kuptuar se kritikat vinin nga bindja e tij se disa vendime po merreshin gabim.

Që nga ajo kohë, Walker ka thënë se marrëdhënia e tyre është përmirësuar dhe se janë takuar disa herë.