Forcat ruse kanë pushtuar 4 mijë e 336 kilometra katrorë territor ukrainas gjatë vitit 2025, që përbën më pak se 1% të sipërfaqes së vendit, sipas një raporti të projektit ukrainas të hartëzimit me burim të hapur DeepState, i publikuar më 1 janar.
Sipas analizës, Moska arriti të marrë nën kontroll 0,72% të territorit total të Ukrainës vetëm në vitin e kaluar, duke përfshirë edhe zona në rajone që më parë nuk ishin të pushtuara. Një ofensivë e re në fillim të vitit i lejoi trupat ruse të bënin përparime të kufizuara në rajonet e Dnipros dhe Sumyt, ku pushtuan përkatësisht 0,6% dhe 1,0% të territorit rajonal.
Ndërkohë, Donetsku ka qenë rajoni më i goditur, pasi gati 78% e territorit të tij është nën kontroll rus, një rritje prej 10 pikësh përqindjeje krahasuar me vitin e kaluar. Luhansku është pothuajse tërësisht i pushtuar, ndërsa në Zaporizhzhia Rusia ka arritur të rrisë kontrollin nga 73% në 75%. Në Kherson, pushtimi mbetet në nivelin 72%.
Në total, që nga fillimi i aneksimit të Krimesë dhe Donbasit në vitin 2014, Rusia ka pushtuar mbi 116 mijë kilometra katrorë territor ukrainas, duke përbërë rreth 19% të sipërfaqes së vendit. Vetëm gjatë vitit 2025, humbjet territoriale të Ukrainës përbëjnë rreth 3,7% të totalit.
Megjithëse Rusia ka bërë përparime në vijën e frontit, ato kanë ardhur me kosto të lartë. Sipas një hetimi të përbashkët të BBC Russia dhe medias së pavarur Mediazona, mbi 156 mijë ushtarë rusë janë konfirmuar si viktima në fushëbetejë, ndërsa shifrat reale mendohet të jenë shumë më të larta. Shtabi i Përgjithshëm i Ukrainës raportoi më 1 janar se Rusia ka humbur rreth 418 mijë e 170 trupa, të vrarë dhe të plagosur, vetëm gjatë vitit 2025.
Presidenti rus Vladimir Putin ka refuzuar thirrjet për armëpushim dhe vazhdon të kërkojë tërheqjen e Ukrainës nga territoret e pushtuara, ndërsa bisedimet e paqes të ndërmjetësuara nga SHBA-të mbeten pa rezultat konkret.
