Tensionet rreth Kupës së Botës 2026 janë përshkallëzuar pasi u bë e ditur se Irani do të bojkotojë shortin për turneun final.

Ceremonia është planifikuar për 5 dhjetor, por një nga vendet kualifikuese nuk do të dërgojë përfaqësues për shkak të një mosmarrëveshjeje të ashpër diplomatike me vendin pritës, Shtetet e Bashkuara.

Vendimi i Iranit vjen si përgjigje e drejtpërdrejtë ndaj refuzimit të autoriteteve amerikane për të lëshuar viza për disa anëtarë të lartë të delegacionit iranian, një veprim që Teherani e përshkroi si të motivuar politikisht dhe të palidhur me sportin.

“Ne e kemi informuar FIFA-n se vendimet e marra nuk kanë të bëjnë me sportin dhe se anëtarët e delegacionit iranian nuk do të marrin pjesë në shortin e Kupës së Botës”, njoftoi zëdhënësi i Federatës Iraniane të Futbollit.

Sipas mediave lokale, midis zyrtarëve që u janë refuzuar vizat për në Shtetet e Bashkuara janë figura të shquara në futbollin iranian. Agjencia e lajmeve Tasnim e Iranit raportoi në tetor se gjithsej shtatë zyrtarëve iranianë u ishin refuzuar vizat. Ndër të prekurit janë presidenti i Federatës së Futbollit të Iranit, Mehdi Taj, dhe drejtori i ekipit kombëtar, Mehdi Karati.

/GazetaBlic Sport/