Deputetja e LDK-së, Doarsa Kica-Xhelili, ka reaguar lidhur me lajmin se dy hetues të Policisë që hetonin Rozeta Hajdarin e Nagip Krasniqin janë dënuar: janë larguar nga njësia kundër korrupsionit, janë degraduar, dhe njëri është transferuar fiks para se të intervistohej ish-ministrja Hajdari, raporton Gazeta Blic.
Ajo përmes një postimi në Facebook, ka thënë se ky është mesazh se nëse “e heton heton VV-në – të pret hakmarrja.”
Ajo ka thënë se në këtë rast demokracia nuk është më funksionale, është fasadë.
Postimi i saj i plotë:
“NË EMËR TË POPULLIT”: FRIKË & HAKMARRJE
Dy hetues të Policisë që hetonin Rozeta Hajdarin e Nagip Krasniqin janë dënuar: janë larguar nga njësia kundër korrupsionit, janë degraduar, dhe njëri është transferuar fiks para se të intervistohej ish-ministrja Hajdari.
Kjo nuk është rastësi. Është mesazh:
E heton VV-në – të pret hakmarrja.
Kur policët ndëshkohen pse hetojnë qeverinë demokracia nuk është më funksionale. Është fasadë.
Në Hungari, hetuesit e papërshtatshëm zëvendësohen. Në Rusi, largohen. Në Venezuelë, shtypen. Kudo, mesazhi është një:
Preke pushtetin – dhe pushteti t’a “tregon vendin”.
Historia na ka bërë kristal të qartë: demokracitë bien kur shoqëria i normalizon këto sjellje. Kur thonë: “Hajt se ndodhin këto.” Jo. Nuk ndodhin këto. Kjo nuk është normale.
Sot degraduan dy hetues. Nesër mund të jetë një prokuror. Pasnesër – gjyqtari. Në fund, je ti në radhë nëse nuk je mjaftueshëm i dëgjueshëm.
Prandaj zgjedhja është e thjeshtë:
Ose je me ata që nënshtrohen.
Ose je me ata që rezistojnë.
MES NUK KA.
