Partia Demokratike e Kosovës iu ka bërë thirrje anëtarëve të saj që gjatë fushatës elektorale të shmangin gjuhën nxitëse, fyese dhe të urrejtjes.

“Partia Demokratike e Kosovës ka qenë gjithmonë një shtyllë e demokracisë, një forcë që mbron sundimin e ligjit dhe respekton rregullat e vendosura, veçanërisht gjatë proceseve zgjedhore”.

“Ndërsa vazhdojmë misionin tonë, roli juaj si përfaqësues të vlerave tona të përbashkëta është më i rëndësishëm se kurrë.Në këtë frymë, ju bëjmë thirrje secilit prej jush që të:Përdorni gjuhë të respektueshme: Shmangni çdo gjuhë nxitëse, fyese ose urrejtjeje, si në komunikimet publike ashtu edhe në ato private. Le të reflektojë diskursi ynë dinjitetin e kauzës sonë”, thuhet në një postim në Facebook të cilin e ka shpërndarë nënkryetarja e PDK-së, Vlora Çitaku.

“Promovoni drejtësinë dhe transparencën: Jepni kontributin tuaj për një proces zgjedhor të drejtë, transparent dhe pa konflikte, duke siguruar që veprimet tona të përputhen me parimet demokratike. Ruani sjelljen shembullore: Përfaqësoni vlerat e PDK-së me dinjitet, përgjegjësi dhe një sjellje shembullore që frymëzon besim dhe unitet”, theksohet mes tjerash në postim.

Më tutje në postim thuhet se respektimi i ligjeve dhe rregullave zgjedhore nuk është vetëm një detyrim ligjor—është një përgjegjësi morale që forcon demokracinë tonë dhe ndërton themelet për suksesin tonë të përbashkët.