Trajneri i Milanit, Paulo Fonseca, pranon se nuk është “kurrë” një moment i mirë për përballje me Atalantën dhe e kupton “në mënyrë perfekte” Pep Guardiolën kur thotë se të luash ndaj La Dea është si të shkosh te dentisti.
Takimi mes dy skuadrave do të zhvilohet nesër, me fillim nga ora 20 e 45, shkruan GazetaBlic Sport.
“Unë mendoj se nuk është kurrë një moment i mirë për të takuar Atalantën,” tha Fonseca, duke buzëqeshur, gjatë një konference për shtyp para ndeshjes.
“Por ne jemi në një moment të mirë, duke u përmirësuar dhe skuadra ka besim. E dimë që është gjithmonë e vështirë të përballesh me Atalantën. Ata kanë fituar tetë ndeshje radhazi, duke shënuar 26 gola dhe duke pranuar vetëm katër. Është një ekip shumë i fortë dhe ne e dimë se do të jetë një ndeshje e vështirë, por ne jemi gati”.
Milani duket më solid në mbrojtje kohët e fundit.
“Mënyra se si mbrohemi i jep besim skuadrës. Mendoj se skuadra është komode në mbrojtje, gjë që i jep besim sulmit”, tha Fonseca.
“Ne nuk kemi parë një skuadër të luajë ballë për ballë për një kohë të gjatë. Futbolli është ciklik, si jeta. Gasperini ka qenë një pionier në përdorimin e këtij stili loje, dhe tani të gjithë në Evropë janë të vetëdijshëm se është e vështirë të përballesh me një ekip si Atalanta.
“Shumë skuadra, si Bayern Munich dhe Stuttgart, luajnë kështu tani. Mendoj se ata e bëjnë këtë sepse kanë ndjekur idetë e Gasperinit. Mënyra e lojës së Atalantës është bërë referencë në Evropë.
/GazetaBlic Sport/
