Ish-Kryeministri i Kosovës, Avdullah Hoti, ka shprehur urimet e tij të përzemërta për Donald Trump dhe JD Vance pas fitores së tyre në zgjedhjet presidenciale të Shteteve të Bashkuara të Amerikës, duke theksuar rëndësinë e lidershipit të tyre për të ardhmen e SHBA-ve dhe marrëdhëniet mes dy vendeve, raporton GazetaBlic.
Në një mesazh të shpërndarë për mediat, Hoti ka vlerësuar zgjedhjet presidenciale si një dëshmi të standardeve demokratike të SHBA-ve, të cilat janë një model për të gjithë botën. Ai ka uruar Trump dhe Vance për fitoren e tyre, duke u shprehur se shpreson për suksesin dhe mbarësinë e tyre gjatë katër viteve të ardhshme në Shtëpinë e Bardhë.
“Zgjedhjet në Shtetet e Bashkuara të Amerikës dëshmuan standardet demokratike amerikane, modelin e demokracisë në gjithë botën. Urime të përzemërta Presidentit Trump dhe Zëvendëspresidentit JD Vance për fitoren e tyre. Mbarësi e suksese në lidershipin e tyre në Shtëpinë e Bardhë gjatë katër viteve në vijim,” tha Hoti.
Ish-Kryeministri gjithashtu shprehu falënderime për Presidentin Joe Biden dhe Zëvendëspresidenten Kamala Harris për mbështetjen që kanë dhënë për Kosovën dhe shqiptarët gjatë katër viteve të fundit, duke theksuar se miqësia e përhershme e popullit të Kosovës me Shtetet e Bashkuara është një nga shtyllat kryesore të shtetësisë kosovare.
“Populli i Kosovës është përherë krah Shteteve të Bashkuara të Amerikës. Miqësia e përhershme e popullit të Kosovës me Shtetet e Bashkuara të Amerikës është një nga shtyllat kryesore të shtetësisë sonë. Duhet të thellojmë marrëdhëniet e veçanta midis dy vendeve,” tha Hoti, duke shtuar se vetëm në koordinim dhe mbështetje nga Shtëpia e Bardhë, Kosova mund të ecë sigurt drejt integrimit euroatlantik.
