Kryeministri i Kosovës, Albin Kurti në 8-vjetorin e vdekjes së Astrit Deharit ka thënë se goditja e njëjtë edhe sot po vazhdon përmes drejtësisë që mungon.

Pas homazheve që bëri, Kurti ka thënë se si Qeveri dhe si Lëvizje Vetëvendosje janë të gatshëm që ta ndihmojnë Prokurorinë e Shtetit me atë çka dinë. Sipas Kurti, rasti i Astrit Deharit, tashmë është marrë në dorë nga prokurori i pestë, pasi siç tha ai katër të tjerët dolën në pension.

“Kjo goditje tejet e rëndë vazhdon edhe pas tetë viteve, në një formë tjetër, nëpërmjet drejtësisë që mungon. Në këto tetë vite, katër prokurorë e kishin rastin e mbytjes në burgun e Prizrenit, të Astritit, por që të katër dolën në pension, pa e kryer punën. Tash është prokurori i pestë që e ka marr rastin”.

“Dhe si LVV, si Qeveri e Republikës, jemi shumë të interesuar, fort të gatshëm, gjithnjë të vullnetshëm, që ta ndihmojmë me krejt çka mundemi e dimë Prokurorinë e shtetit, për të sjellë drejtësi për Astritin dhe familjen e tij”, tha Kurti para gazetarëve.