Prokuroria Speciale e Kosovës ka zhvilluar sot një aksion në në Ministrinë e Mjedisit, Planifikimit Hapësinor dhe Infrastrukturës, duke arrestuar një person me inicialet I.B., i cili dyshohet për “Keqpërdorim të detyrës” dhe “Armëmbajtje pa leje”. Një i dyshuar tjetër, N.H., që akuzohet për “Shpëlarje parash” dhe mosraportim të pasurisë, është në arrati.
Gjatë bastisjes janë sekuestruar armë, dokumente, pajisje elektronike dhe banesat e të dyshuarve janë ndaluar përkohësisht. Hetimet vazhdojnë për përfshirjen e të tjerëve në këtë aktivitet kriminal.
Komunikatë e përbashkët për media nga Prokuroria Speciale dhe Policia e Kosovës
Me urdhër të Prokurorisë Speciale të Kosovës sot është zhvilluar një aksion në MMPHI, në Prishtinë, aksion ky, i cili është bërë pas zhvillimit të hetimeve disamujore.
Gjatë këtij aksioni, hetuesit e Sektorit për Hetimin e Krimeve Ekonomike nga Policia e Kosovës kanë realizuar arrestimin e një personi të dyshuar, kurse i dyshuari tjetër nuk është gjetur në vendbanim e tij.
I arrestuari me inicialet I.B. dyshohet se ka kryer veprat penale: “Keqpërdorim i detyrës apo autoritetit zyrtar” dhe “Armëmbajtje pa leje”, kurse i dyshuari tjetër me inicialet N.H. dyshohet se ka kryer veprat: “Keqpërdorim i detyrës apo autoritetit zyrtar” “Shpëlarje e parave” dhe “Mosraportim apo raportim i rremë i pasurisë i të ardhurave, i dhuratave, i dobisë tjetër pasurore ose i detyrimeve financiare”.
Gjatë bastisjes janë sekuestruar dëshmitë si në vijim:
Një (1) revole e tipit MAUSER-WERKR me dy (2) karikator me nga shtatë (7) fishekë, dhe një kuti me pesëdhjetë e katër (54) fishekë 9 mm.
Tridhjetë e katër (34) fletë dokumente të ndryshme.
Tre (3) telefona, një (1) IPhone 15 ProMax, një (1) IPhone 12 ProMax, një (1) IPhone 11 ProMax
Shtatëmbëdhjetë (17) USB.
Tre (3) llaptop HP.
Katër (4) shtëpiza kompjuteri si dhe
Dokumente të rëndësishme për procedurën hetimore.
Gjithashtu është lëshuar urdhër i përkohshëm ndalimi për 6 banesa, me lokacione në Prishtinë dhe Fushë Kosovë.
Me aktvendim të Prokurorit nga PSRK-ja, i dyshuari me inicialet I.B. është dërguar në mbajtje për 48 orë, ndërsa hetimet vazhdojnë për të identifikuar çdo person tjetër që mund të jetë i përfshirë në këtë aktivitet kriminal.
