Deputeti i Partisë Demokratike, Ervin Salianji ka dërguar një letër nga burgu i Fierit, aty ku po vuan dënimin për dosjen”Babale”, lidhur me zhvillimet e fundit në ambjentet e Kuvendit.

Letra, e cila i është dorëzuar avokatit në orën 13:45 minuta, vjen pasi ditën e sotme deputetët e përjashtuar të PD, së bashku me kolegët e tyre, bllokuan hyrjet e parlamentit, duke penguar socialistë të hyjnë në sallë.

Përplasjet u përshkallëzuan deri në konfrontime fizike mes deputetëve të të dy kampeve politike.

Në letër Salianji shkruan se kampi i mazhorancë po sillet si të ishte viktima e “dhunës së opozitës”, duke përdorur institucionet dhe komisionet e partisë si një mjet për të shkatërruar demokracinë.

Letra e plotë:

“Shfaqja e agresorëve si viktima, e dhunuesve si të dhunuar, e abuzuesve si të prekur nga prekja e pronës publike është hipokrizi neveritëse.

Njësoj siç vjedhin dhe përgjegjësine e mbajnë denoncuesit, siç shkretojnë dhe shkatërrojnë, siç e ndajnë Shqipërinë si plaçkë lufte për bandat dhe mes bandave, siç përndjekin administratën, shkatërrojnë meritokracinë, sot po përpiqen të sillen si viktima.

Dhuna dhe brutaliteti më i madh është eleminimi i kundërshtarit politik duke asgjësuar dhe nënshtruar institucionet.

Duke përdorur institucionet, si komisionet e partisë, për të fshikulluar dhe hequr lirinë dhe asgjesuar të drejtat.

Krimi më i madh është shkatërrimi i demokracisë, shtetit të së drejtës dhe sundimit të ligjit.

Pas vrasjes, burgosja politike është forma më e rëndë dhe më brutale e dhunës.

Opozita po mbrohet dhe po mbron demokracinë dhe interesin publik.”