Një tifoz irlandez 51-vjeçar i Liverpool-it vdiq mbrëmë teksa po përpiqej të kalonte autostradën A4 pranë aeroportit Orio al Serio në Bergamo, pretendojnë raportimet në Itali.

Burime të shumta në Itali, duke përfshirë La Gazzetta dello Sport dhe Il Corriere della Sera, raportojnë se një tifoz 51-vjeçar i Liverpool nga Irlanda vdiq pasi u përplas nga një automjet të hënën në mbrëmje, transmeton GazetaBlic Sport.

Tifozi, identiteti i të cilit nuk dihet ende, po kalonte autostradën A4 pranë aeroportit Orio al Serio në Bergamo.

51-vjeçari kishte zbritur në Itali nga Mançesteri dhe ishte me dy persona të tjerë që nuk ishin në vendngjarje kur autoritetet lokale gjetën trupin e tij.

Sipas Il Corriere della Sera , ai ishte një tifoz i Liverpoolit nga Irlanda dhe kishte në xhep një biletë për ndeshjen e sonte në Ligën e Kampionëve mes Milanit dhe Reds në ‘San Siro’.

Sipas raportit, ai kaloi autostradën duke u përpjekur të arrinte në hotelin ku do të kishte fjetur, hotelin NH.

/GazetaBlic Sport/