Njohësi i çështjeve politike, Xhevdet Pozhari thotë se partitë t opozitare nuk kanë ndonjë koncept ndryshe për ta fituar pushtetin.
Pozhari në një përgjigje dhënë për GazetaBlic kritikoi opozitën për qasjen ndaj kryeministrit Kurti, teksa shton se ky i fundit do ta bëjë dallimin në zgjedhjet e 9-shkurtit.
“Vullnetin për koalicone përveç partive AAK-NISMA, të tjerat kanë dhënë sinjale që do t’i shqyrtojnë koalicionet vetëm pas rezultatit të zgjedhjeve. Zhurma është koncentruar në akuza dhe kundër akuza, deri tash nuk kemi parë ndonjë koncept ndryshe të partive që synojnë ta marrin pushtetin, përpos që kritika është orientuar veç tek emri i Albin Kurtit, i cili konsiderohet që në këto zgjedhje do ta bëjë dallimin”, tha Pozhari.
Ndërsa, analisti politik, Arbnor Sadiku thekson se nuk do të ketë koalicion parazgjedhor mes partive të tjera, përveç AAK-NISMA.
“Nuk mendoj se mund të ketë koalicion parazgjedhor në mes të partive tjera politike”, tha Sadiku për GazetaBlic.
Subjektet politike deri të premten kanë afat t’i deklarojnë në Komisionin Qendror të Zgjedhjeve (KQZ), koalicionet parazgjedhore për votimet e fillim vitit të ri, ka bërë të ditur për EO, zëdhënësi i KQZ-së, Valmir Elezi.
Elezi ka thënë se pas 30 gushtit, secili subjekt politik që s’ka deklaruar koalicion deri më këtë datë do të obligohet të garojë i vetëm në zgjedhjet e 9 shkurtit.
“Sipas ligjit për zgjedhjet e përgjithshme, partitë politike të cilat janë të regjistruara në KQZ dhe të cilat duan të marrin pjesë në zgjedhjet në shkurt të viti 2025 përmes koalicionit duhet ta njoftojnë KQZ, respektivisht Zyrën për regjistrim, certifikim dhe kontrollim financiar të subjekteve politike si duna të marrin pjesë në këto zgjedhje në këtë mënyre. Afati i fundit për të bërë këtë njoftim është data 30 gusht pra deri ne këtë kohë të gjitha partitë politike duhet të njoftojnë KQZ-në se në zgjedhjet e 9 shkurtit do të marrin pjesë përmes koalicionit”, ka thënë Elezi.
Zëdhënësi i KQZ-së ka deklaruar se deri të hënën, nuk kanë pranuar asnjë koalicion.
“Koalicioni mund të ndërtohet nga së paku dy parti politike dhe partia politike nuk mund të tërhiqet nga koalicioni pasi të jete certifikuar deri sa rezultati i zgjedhjeve të certifikohet nga ana e KQZ. Gjithashtu partia politike e cila është anëtare e koalicionit nuk mund të marr pjesë si anëtare në një koalicion tjetër, pra të partive të tjera apo edhe si parti e veçanta në procesin zgjedhor. Deri në këto momente që flasim në KQZ nuk kemi pranuar ndonjë njoftim nga ana e partive politike se do të kërkojnë certifikim në zgjedhje përmes koalicionit. Afati i fundit për të bërë këtë deklarimi është data 30 gusht”, ka thënë ai.
Presidentja e Kosovës, Vjosa Osmani, ka caktuar 9 shkurtin 2025 si datë të zgjedhjeve të përgjithshme. Vendimi vjen pas takimit ku presidentja dëgjoi të gjitha partitë.
