Një person i katërt është arrestuar dhe akuzuar për vrasjen e liderit separatist Sikh Hardeep Singh Nijjar vitin e kaluar, tha policia kanadeze të shtunën, në një rast që tensionoi marrëdhëniet diplomatike me Indinë.

Policia kanadeze në fillim të këtij muaji arrestoi dhe akuzoi tre burra indianë në qytetin Edmonton në Alberta dhe tha se po hetonin nëse këta burra kishin lidhje me qeverinë indiane.

Ekipi i Integruar i Hetimit të Vrasjeve (IHIT) njoftoi të shtunën se Amandeep Singh, 22 vjeç, është akuzuar për vrasje të shkallës së parë dhe komplot për të kryer vrasje në vrasjen e Nijjar.

Singh, një shtetas indian që banonte në Brampton, Surrey dhe Abbotsford, ishte tashmë në paraburgim për akuza të palidhura me armë zjarri nga Peel, Ontario, tha IHIT.

Nijjar, 45 vjeç, u qëllua për vdekje në qershor jashtë një tempulli sikh në Surrey, një periferi e Vankuverit me një popullsi të madhe sikësh. Disa muaj më vonë, kryeministri kanadez Justin Trudeau citoi atë që ai tha se ishte dëshmi e përfshirjes së mundshme të qeverisë indiane, duke shkaktuar një krizë diplomatike me Nju Delhi, shkruan Reuters.