Drejtori i Fiorentinës, Joe Barone, vdiq në Milano të martën në moshën 57-vjeçare, konfirmoi skuadra e Serisë A në rrjetet sociale.

Fiorentina konfirmoi se drejtori i përgjithshëm i tyre Joe Barone vdiq të martën në spitalin San Raffaele në Milano në moshën 57-vjeçare, transmeton GazetaBlic Sport.

Barone u dërgua me urgjencë në spital në gjendje kritike të dielën pasdite, pasi pësoi arrest kardiak disa orë para ndeshjes së Serie A midis Fiorentina dhe Atalanta në stadiumin Gewiss në Bergamo.

Ai iu nënshtrua një operacioni në zemër të dielën dhe Fiorentina tha të hënën se 57-vjeçari ishte në gjendje të rëndë. Barone do të kishte mbushur 58 vjeç nesër, më 20 mars.

Drejtori italo-amerikan u emërua Drejtor i Përgjithshëm i Fiorentinës kur Rocco Commisso bleu klubin nga familja Della Valle në verën e vitit 2019. Ai kishte shërbyer si zëvendëspresident i New York Cosmos nga viti 2017 deri në emërimin e tij në Fiorentina.

/GazetaBlic Sport/