Joe Biden ishte sfidues për çështjen e luftës në Ukrainë gjatë fjalimit të tij për Gjendjen e Bashkimit mbrëmë.

“Ukraina mund ta ndalë Putinin nëse qëndrojmë me Ukrainën”, tha ai, raporton SKynews.

Presidenti ka qenë duke “luftuar” për të marrë këstin e tij të fundit të ndihmës për Ukrainën.

Projektligji, me vlerë rreth 95 miliardë dollarë, u miratua nga Senati i udhëhequr nga demokratët më 13 shkurt, por ka të ngjarë të përballet me kundërshtime të forta në Dhomën e Përfaqësuesve të kontrolluar nga republikanët.

Të dy dhomat e Kongresit duhet të miratojnë projektligjin përpara se Bideni ta nënshkruajë atë në ligj.

Rreth 60 miliardë dollarë të paketës ndahen vetëm për ndihmën ushtarake për Ukrainën.

Megjithatë, ish-presidenti Donald Trump dhe aleatët e tij republikanë në Kongres duan financime të drejtuara drejt çështjeve të brendshme si kontrolli i kufijve, në vend të luftërave të jashtme.