Përfaqësuesi i BE-së për dialogun Kosovë-Serbi, Miroslav Lajçak, qëndroi dje në Kosovë, ku u takua me zv/kryeministrin Besnik Bislimi.
Ai tha se përpos për marrëveshjen e Brukselit, zbatimin e saj e Asociacionin, ka folur edhe për çështjen e dinarit.
Por, ndryshe nga Lajçak, nga Qeveria thanë se Bislimi ka deklaruar se dinari nuk është pjesë e dialogut.
Lidhur me këtë, njohësi i çështjeve politike, Halil Matoshi, në një prononcim për Gazeta Blic, thotë se Kurti e Bislimi po jetojnë në dy hemisfera njëkohësisht, në realitetin gri që Kosova po humb aleatët dhe në propagandë që gjithçka po shkon për mrekulli.
“Kryeministri Albin Kurti dhe zëvendësi i tij Bislimi, jetojnë në dy hemisfera njëkohësisht. Në realitetin gri të Kosovës që po i humb aleatët e miqtë për teke e politika të papërgjegjshme dhe në propagandë ku çdo gjë ecë mrekullisht bukur!? Partia në pushtet ka krijuar botën e saj paralele me tik-tok, spiunazh e polici, derisa qytetarët të shkrirë në turma pa kauza reale ende besojnë në mashtrim”, shprehet ai.
Sipas Matoshit, Bislimi pranoi të dialogojë për dinarin me Lajçakun që e sheh si pro serb.
Ai shton se Kurti s’ka asnjë ide politike për vendin, ndërsa që opozita e përkrah në veprimet e tij.
“Bislimi po që pranoi të negociojë dinarin serb në Bruksel me Lajçakun që turma e sheh si proserb!? Taktika të Luftës së Ftohtë, pa asnjë strategji, sepse Kurti & company nuk kanë asnjë ide politike për vendin. Kështu është derisa opozita e mbështet Kurtin në raport me hapat e tij të njëanshëm në veri të vendit, kurse qytetari është i bombarduar me propagandë dhe folklor nacionalromantik”, deklaron analisti Halil Matoshi./Gazeta Blic/
Takimi Bislimi-Lajçak/ Nga Qeveria tregojnë se çka u diskutua