Afrika e Jugut tha se i ishte drejtuar Gjykatës Ndërkombëtare të Drejtësisë (ICJ) të OKB-së sipas konventës së Gjenevës në lidhje me aktet e kryera nga Izraeli në Gaza.

Në një deklaratë, Afrika e Jugut tha se ishte “shumë e shqetësuar për gjendjen e rëndë të civilëve” të kapur në sulmet izraelite në Rripin e Gazës “për shkak të përdorimit pa dallim të forcës dhe largimit me forcë të banorëve”, raporton Guardian.

Aty thuhet se kishte “raporte të vazhdueshme të krimeve ndërkombëtare, të tilla si krimet kundër njerëzimit dhe krimet e luftës” që po kryheshin, si dhe “raporte që përmbushin pragun e gjenocidit” në territorin palestinez.

Një kërkesë në lidhje me këtë është paraqitur para gjykatës më 29 dhjetor 2023, në të cilën gjykatës i kërkohet të deklarojë në mënyrë urgjente se Izraeli po shkel detyrimet e tij në lidhje me konventën e gjenocidit, duhet të ndërpresë menjëherë të gjitha veprimet dhe masat në lidhje me këto detyrime dhe të ndërmarrë një sërë veprimesh të ndërlidhura.

Kërkesa sugjeron se Afrika e Jugut “dënon të gjithë dhunën dhe sulmet kundër të gjithë civilëve, duke përfshirë izraelitët”, duke shtuar se vazhdimisht ka bërë thirrje për një armëpushim të menjëhershëm dhe të përhershëm dhe për rifillimin e bisedimeve “që do t’i japë fund dhunës që lind nga okupimi i vazhdueshëm luftarak i Palestinës”.