Tifozat Kuq e Zi festojnë sot 20-vjetorin e krijimit. Tifogrupi më i madh që mbështet skuadrën kombëtare dhe këdo që lartëson flamurin kuqezi, do të festojë në sheshin Skënderbej, duke nisur nga ora 18:00.

Të shumta kanë qenë urimet, mes tyre edhe nga Armand Duka, presidenti i FSHF-së, i cili thekson në postimin e tij se të palodhurit e TKZ-së kanë frymëzuar e motivuar pa pushim lojtarët e kombëtares së zemrave shqiptare.

POSTIMI I DUKËS

Ky fundviti, përveçse kulmoi me kualifikimin historik të Kombëtares shqiptare për në finalet Euro 2024, sjell edhe një tjetër moment të rëndësishëm. Grupimi “Tifozat Kuq e Zi” feston 20-vjetorin e themelimit. Bëhet fjalë për ata që janë prej dy dekadash, lojtari i 12-të i Kombëtares.

Nuk kanë munguar kurrë në apel. Kanë qenë gjithmonë aty. Në të mirë e në të keq, në shtëpi apo në transfertë, Tifozat Kuq e Zi kanë mbështetur pa asnjë kursim Kombëtaren shqiptare. Ata pa u lodhur, kanë frymëzuar e motivuar djemtë e skuadrës tonë të zemrës pa pushim.

Janë kthyer në një simbol e mbështetje e madhe për Kombëtaren, duke u bërë një pjesë e pandashme e saj dhe e pazëvendësueshme e saj. Na kanë bërë krenarë çdo herë dhe në çdo ndeshje, duke qenë një burim force për ekipin, por edhe për të gjithë të tjerët.

Në këtë përvjetor të veçantë, i uroj TKZ-së edhe 100 vite të tjera në këtë mision kaq të bukur dhe të pazëvendësueshëm. Uroj të vazhdojnë ta mbështesin Kombëtaren edhe më shumë në të ardhmen.

Duke valëvitur gjithmonë lart flamurin shqiptar në çdo stadium të botës dhe duke kënduar “O sa mirë me qenë shqiptar”.

Gëzuar përvjetorin. Faleminderit!