Gjin Marku, kreu i komitetit të Pajtimit Ndërkombëtar të Gjaqeve ka folur për rastin e vrasjes së Liridona Ademaj, përkatësisht përmendi deklarimet e babait të Naim Murselit, si të dyshuarit kryesor për vrasjen e Liridonës.

Marku tha se nuk ka qenë dakord me daljet publike të babait të Naim Murselit, Shaban Murselit.

Sipas tij ky i fundit duhet të heshtë dhe të mos ndikohet nga opinioni publik.

“Nuk kam qenë dakord me daljet e tij në media sepse kam pritur që në fillim që ai të heshtë dhe të ishte me një dhimbje shumë më të madhe se vetë familja e viktimës. Ai nuk duhet të kishte folur pavarësisht nga presioni që mund të kishte nga mediat. Ai duhet të heshtë dhe të mbante një qëndrim të qartë se kjo nuk i përket vetëm familjes së tij por dhe jashtë familjes së tij. Është produkt që djalin e ka mbërthyer një e keqe shumë e madhe në shoqëri”, deklaroi ai për Euronews Albania.