10 persona janë arrestuar nga policia në aksionin kundër krimeve kibernetike që u zhvillua në 14 lokacione të shtatë qyteteve të Kosovës: Prishtinë, Gjilan, Ferizaj, Kaçanik, Drenas, Suharekë dhe Deçan.
Sipas Prokurorisë Themelore të Prishtinës të dyshuarit i kanë dëmtuar katër institucione financiare.
“Për shkak të dyshimit të veprave penale “Hyrja në sistemet kompjuterike”, dhe “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit”.
“Vlera e dëmit e shkaktuar deri më tani tejkalon shumën prej 400 mijë eurosh”, thuhet në njoftimin e prokurorisë.
“Po ashtu, nga ky aksion i realizuar janë sekuestruar prova të ndryshme të cilat do të shërbejnë në procedurën penale, si dhe dobi pasurore e përfituar nga veprat penale të lartcekura”, theksohet.
