Ish-ambasadori i Kosovës në Maqedoninë e Veriut, Gjergj Dedaj, në një intervistë dhënë për “Gazeta Blic” ka folur në lidhje me zhvillimet e fundit në veri të vendit.
Dedaj tha se e gjitha çfarë po ndodh në veri është tepër shqetësuese për të gjithë qytetarët e Kosovës por edhe për “Komunitetin Ndërkombëtar”.
“Të gjitha zhvillimet që po ndodhin në veri të vendit i kam parë me shumë shqetësim. Kjo çfarë po ndodh atje po paraqet një shqetësim për të gjithë qytetarët e Kosovës por jo vetëm, edhe për ‘Komunitetin Ndërkombëtar’ dhe vendet fqinje dhe shpresojmë që sa më shpejt të deeskalojë situata në këtë pjesë të Kosovës” tha Dedaj për “Gazeta Blic”
Ai pati kritika të forta në lidhje me qëndrimin e Kurtit në gjithë këtë situatë.
Dedaj tha se qasja e tij mund të ketë pasoja fatale për të ardhmen e Kosovës.
“Kjo është një gabim dhe mund të ketë edhe pasoja fatale për të ardhmen e Kosovës, për procesin e integrimit euro-atlantik të Kosovës por edhe për vetë shtetin e Kosovës. Tashmë pasojat kanë fillu me masat që këta po i quajnë në mënyrë të ‘butë’ masa a në fakt këto janë sanksione kundër Kosovës që mendoj se janë të padrejta sepse ato nuk do të duhej t’iu vendosen qytetarëve të Kosovës dhe Kosovës por liderve të cilët janë fajtorë për këtë gjendje e cila është e papranueshme, e dëmshme, e rrezikshme, dhe me pasoja të paparashikueshme. Unë shpresoj se situata do të deeskalohet dhe kryeministri Kurti dhe Vjosa Osmani duhet të ndërgjegjësohen, të jenë të përgjegjshëm sepse ata kanë marrë besimin në vitin 2021 nga qytetarët e Kosovës për të bërë realitet dhe për ta forcu shtetin e Kosovës, për proceset integruese, për partneritet me miqtë tanë dhe tashmë po ndodh krejtësisht e kundërta”
Kritika, Dedaj, pati edhe për partitë opozitare duke i cilësuar si oportuniste .
Ai tha se të njëjtat(partitë opozitare) nuk duan të hyjnë në ‘ring’ për të fituar betejat.
“Unë mendoj se opozita është mjaft oportuniste dhe ka marrë disa qëndrime dhe vendime shumë ‘kozmetike’ të cilat nuk i bëjnë jo vetëm nder Kosovës por nuk i ndihmojnë edhe proceseve nëpër të cilat po kalon Kosova, procese mjaft të ndjeshme dhe të rrezikshme. Opozita nuk duhet të sillet me komoditet, çdo betejë fitohet në ‘ring’, ato nuk fitohen në shkallët e stadiumit. Opozita në njëfarë mënyre nuk ka dëshirë me hy në ‘ring’ edhe të ‘përgjaket’ për të fituar betejat dhe për ta ndryshu këtë pushtet i cili tani është duke rrezikuar të ardhmen e Kosovës, partneritetin me SHBA-të, BE-në, Shqipërinë.Cilido lider i Kosovës që i cënon raportet me Uashingtonin, Brukselin dhe Tiranën, ai është i rrezikshëm dhe nuk punon për të mirën e Kosovës” tha Dedaj për “Gazeta Blic”
Intervistën e plotë mund ta ndiqni në faqen e facebook të “Gazeta Blic”
