Florian Bieber, njohës i Ballkanit dhe profesor në Universitetin e Grazit, në intervistën për “N1” ka vlerësuar se situata aktuale në Kosovë është “më e keqja në 10 vitet e fundit”.
“Po flas edhe për nivelin e gjuhës së urrejtjes nga serbët ndaj shqiptarëve, çdo ditë përdoren fjalë shumë të ashpra dhe e gjithë kjo ndryshon atmosferën për ta vështirësuar imagjinatën e pranimit të ndonjë marrëveshjeje që mund të përmbajë njohjen e interesave të anës tjetër. Në fund, kjo është në dëm të qytetarëve të Kosovës, përfshirë serbët që jetojnë në veri”, ka theksuar Bieber.
Ai kujton se në periudhën e kaluar kemi pasur shumë situata të tensionuara në rrugën Beograd-Prishtinë dhe se konfliktet e armatosura nuk kanë ndodhur kurrë.
“Prandaj mendoj se mundësitë për konflikt të armatosur janë mjaft të vogla, sepse pala serbe e di që NATO është në Kosovë, ndërsa Kosova nuk dëshiron të krijojë konflikt. Unë shoh një përshkallëzim, por nuk shoh mundësinë që ne të futemi në një konflikt më serioz se sa ata që kemi pasur deri më tani”, thotë Bieber, transmeton FrontOnline.
Ai përkujton se kriza aktuale filloi me konfirmimin e ekzistimit të propozimit franko-gjerman për zgjidhjen e problemit në Kosovë.
“Atëherë u rritën tensionet. Atëherë është e qartë se secila palë, veçanërisht Serbia, po përpiqet të rrisë tensionet për të parandaluar një zgjidhje, ose për të marrë një pozicion më të mirë në negociata”, thotë Bieber duke paralajmëruar se situata aktuale mund të përshkallëzohet ende në një konflikt të hapur dhe të jetë jashtë kontrollit të qeverisë në Beograd dhe Prishtinë.
Megjithatë, ai beson se kriza është “nën kontroll” tani për tani dhe se ajo është “ngritur qëllimisht”. Bieber beson se pala serbe është më përgjegjëse për situatën aktuale.
“Qëndrimi i Qeverisë së Serbisë është se “status quo”-ja në Kosovë i përshtatet më së miri. Çdo hap drejt zgjidhjes është humbje për pushtetin aktual serb. Edhe formimi i Asociacionit të Komunave Serbe do të ishte humbje sepse atëherë nuk do të kishte argumentin se qeveria në Prishtinë është gjithmonë fajtore për gjithçka… Kriza u shkon për shtat të ruajnë ‘status quo’-në dhe të përfshijnë situatën ndaj Rusisë në atë përllogaritje”, tha ai.
Duke folur për akuzat e zyrtarëve më të lartë serbë ndaj ambasadorit gjerman në Kosovë, Jorn Rode, ai thotë se Gjermania është një partner i rëndësishëm serb dhe se marrëdhëniet ekonomike ndërmjet Serbisë dhe Gjermanisë janë në nivel të lartë.
“Ndjej një transferim të fajit kur e dëgjoj apo lexoj këtë, sepse kryeministrat e qeverive nuk sillen kështu dhe ka një ndjenjë të pamjaftueshme diplomatike në qeverinë serbe. Kjo tregon se ata mendojnë se mund ta trajtojnë kështu ambasadorin gjerman, që është një gabim i madh. Gjermania ka qenë një investitor i rëndësishëm në 10 vitet e fundit. Ajo ishte një nga aktorët kryesorë në rajon”, tha Bieber.
Ai dyshon se zyrtarët serbë do të sulmonin në të njëjtën mënyrë ministrat gjermanë apo zyrtarët e tjerë të lartë të qeverisë.
Ai thekson se presidenti i Serbisë, Aleksandar Vuçiq, ka një shkallë të plotë të kontrollit mbi serbët në Kosovë, ndërsa presidenti i mëparshëm serb, Boris Tadiq nuk e ka pasur kurrë atë.
Vuçiq mund të ‘mbijetojë ndonjë thyerje’, ndërsa Tadiq jo. Në atë kohë, Vuçiq dukej se ishte një alternativë e pranueshme pro-evropiane, por ne i kemi parë rezultatet. “Vuçiq ishte larg kësaj”, tha Bieber.
Ai thekson se interesi kryesor i SHBA-së është prishja e marrëdhënieve ndërmjet Serbisë dhe Rusisë. “Nuk është në interesin e Amerikës që Rusia të ketë aleatë në Evropë”, përfundoi Bieber.
