“Veteranët e luftës së Kosovës përleshen me policinë, duan pensione më të larta”.
Ky është titulli i artikullit të agjencisë së lajmeve AP, për protestën e sotme të veteranëve në Prishtinë, raporton Gazeta Blic.
AP shkruan se qindra veteranë të luftës së Kosovës u përleshën me policinë në një protestë të hënën për të kërkuar rritjen e pensionit, duke lënë të paktën një oficer të plagosur.
Policia përdori gaz lotsjellës për të mbajtur anëtarët e Organizatës së Veteranëve të Luftës së Ushtrisë Çlirimtare të Kosovës (UÇK) larg parlamentit, i cili po diskutonte një projektligj për ngritjen e pagës minimale nga 170 euro në 250 euro në muaj.
Më shumë se 30,000 veteranë të luftës marrin 170 euro në muaj, por nuk janë përfshirë në projektligj.
Ata u futën me forcë në oborrin e parlamentit pavarësisht gazit lotsjellës. Ata u përpoqën gjithashtu të hynin në sallë, por u mbajtën larg nga një kordon policie.
Ndërsa, Reuters shkruan se Policia e Kosovës përdori sprej piper të hënën për të shpërndarë rreth 2,000 veteranë të luftës që u përpoqën të hynin në parlament për të protestuar kundër një projektligji për pagën minimale të sektorit publik që i përjashton ata, raporton Gazeta Blic.
Fondi Monetar Ndërkombëtar dhe institucionet e tjera financiare kanë paralajmëruar se Kosova e varfër financiarisht, e rrënuar nga varfëria dhe korrupsioni, nuk mund të përballojë të japë përfitime më të larta për gati 50,000 veteranë të regjistruar të luftës.
Ligjvënësit ishin planifikuar të hënën të debatonin një ligj për të rritur pagën minimale të sektorit publik, por mbështetja për veteranët e luftës nuk u përfshi.
Duke u përballur me kritikat nga opozita dhe grindjet brenda partisë në pushtet, deputetët nuk e miratuan ligjin pasi nuk kishte kuorum për të vazhduar.
Qeveria ka propozuar që paga minimale të rritet në 250 euro nga 170 euro që është një nga më të ulëtat në Evropë.
Rreth orës 10 të mëngjesit veteranët filluan të mblidheshin para parlamentit dhe policia hodhi sprej piper kur ata u përpoqën të futeshin në ndërtesë.
Policia tha se dy nga oficerët e saj u plagosën gjatë dhunës.
“Nëse qeveria nuk e ndryshon ligjin do të protestojmë sërish, do të jenë më masive dhe më të dhunshme”, tha veterani i luftës Nexhat Veseli.
Veteranët e UÇK-së thonë se autoritetet e Kosovës nuk kanë arritur t’u japin atyre përfitime dhe respekt në përpjesëtim me rolin e tyre kyç në arritjen e shtetësisë për kombin e vogël ballkanik.
Protesta përfundoi pas disa orësh, kur veteranët e luftës morën lajmin se parlamenti nuk kishte miratuar ligjin e ri./Gazeta Blic/
