Presidenti i Shqipërisë, Ilir Meta, ka reaguar në lidhje me kandidaturën e Bajram Begajt të propozuar nga socialistët për kreun e shtetit.

Përmes zëdhënësit të tij Tedi Blushi, Meta sqaron se President i ri i Republikës dhe do të respektojë çdo vendim të Kuvendit të shprehur me votë.

Për t’u bërë president, Begaj duhet të marrë firmën e Ilir Metës, pasi ligji për Forcat e Armatosura sanksionon se ushtarakët aktivë duhet të dalin në lirim përpara se sa të zgjidhen apo emërohen në poste të tjera, ku socialistët duket se e kishin menduar edhe këtë fakt.

“Presidenti i Republikës, Sh.T.Z Ilir Meta është në ndjekje të procedurës për zgjedhjen e zotit Bajram Begaj si President i ri i Republikës dhe do të respektojë çdo vendim të Kuvendit të shprehur me votë. Lidhur me këtë çështje dhe specifikat e saj Presidenti Meta ka zhvilluar sot një bisedë telefonike me Ministrin e Mbrojtjes, Niko Peleshi”, tha ai.

Kujtojmë se Meta ndodhet në një vizitë zyrtare në Stamboll dhe vendimi për Begajn duhet të merret përpara seancës së orës 18:00 kur është parashikuar edhe votimit.

Në mbledhjen e grupit socialist Taulant Balla u shpreh se grupi ka marrë masat që kjo kandidaturë të mos bllokohet as nga Ilir Meta.