Alvaro Morata shënoi për Spanjën në Ligën e Kombeve këtë mbrëmje dhe pranoi se e ardhmja e tij në Juventus nuk varet nga ai.

Qendërsulmuesi zhbllokoi rezultatin në barazimin 1-1 me Portugalinë në Sevilje të enjten në mbrëmje, përcjell GazetaBlic Sport.

E ardhmja e tij është në ajër, pasi Juventusi nuk duket i gatshëm të aktivizojë opsionin e tyre për të blerë atë, kjo  pas një huazimi dyvjeçar nga Atletico Madrid.

Bianconerët po përpiqen të negociojnë një zbritje dhe mund ta lënë atë të largohet.

“Nuk varet nga unë, nuk mund të bëj asgjë për këtë”, tha Morata për Relevo pasi shënoi golin e tij të 25-të në 52 paraqitjet e tij për Spanjën.

“Gruaja dhe fëmijët e mi do të më ndjekin kudo që të duhet të shkoj. Unë kam preferenca dhe opsione, por dua të shkoj aty ku klubi është i interesuar të luajë me mua.”

29-vjeçari shënoi 12 gola dhe kontribuoi me nëntë asistime në 48 ndeshje konkurruese për Juventusin këtë sezon.

/GazetaBlic Sport/