Agjencia e Statistikave të Kosovës (ASK) ka vlerësuar se viti 2021 ka qenë viti me rritjen më të madhe të çmimeve në vend. Por, rritjet vazhdojnë të vërehen edhe në fillim të vitit 2022.
Në Tregun e Gjelbër në Prishtinë dhe disa dyqane ushqimore vërehen rritje të çmimeve të pemëve dhe perimeve, si dhe të produkteve të tjera bazike, në krahasim me periudhën e njëjtë të vitit të kaluar.
Çmimi i specave pa djegës për kilogram në një dyqan ushqimor në Prishtinë është 3.49 euro. Sipas të dhënave të ASK-së, në muajin shkurt të vitit 2021, çmimi mesatar i këtij produkti ka qenë 2.14 euro.
Në Tregun e Gjelbër, një kilogram domate po shitet për 1.50 euro, teksa në një dyqan çmimi ishte 1.99 euro, kurse sipas ASK-së një kilogram domate në shkurt të vitit 2021 mesatarisht shitej për 1 euro. Në një tezgë janë ekspozuar mandarina dhe çmimi i tyre është 80 centë për kilogram.
Një lloj i mollëve po shitet për 50 centë kilogrami. Sipas çmimeve mesatare të shkurtit të vitit 2021, çmimi i këtij produkti ishte më i shtrenjtë, përkatësisht 68 centë. Përveç çmimeve fikse për molla, ka edhe oferta të tilla, ku 3 kilogramë të këtij lloji të mollës mund të blihen për 2 euro.
Në Tregun e Gjelbër, çmimi për një kilogram portokaj është 60 centë. Një lakër në këtë tezgë të Tregut të Gjelbër kushton 50 centë. Një kilogram patate po shitet për 50 centë. Vitin e kaluar, referuar çmimeve mesatare për muajin shkurt, ky produkt shitej për 51 centë.
Lirim i çmimeve vërehet te limonët. Në një tezgë në Tregun e Gjelbër ky produkt po shitet për 80 centë për një kilogram. Vitin e kaluar, çmimi mesatar i këtij produkti ishte 1.12 euro.
Një kilogram spec djegës në një dyqan ushqimor të Prishtinës po shitet për 2.79 euro. Kilogrami i qepës së kuqe po shitet për 80 centë. Kurse çmimi i një kilogrami spinaq është 1 euro.
Qepët po shitet për 50 centë. Çmimi i një kilogrami fasule në Tregun e Gjelbër është 2.50 euro, ku sipas ASK-së, çmimi mesatar i këtij produkti në shkurtin e vitit të kaluar ishte 2.55 euro.
Në një dyqan në Prishtinë, çmimi për 900 gramë oriz është 95 centë. Vitin e kaluar, çmimi mesatar ishte 1.39 euro. Çmimi i një kilogrami banane në një dyqan në Prishtinë është 1.19 euro. Sipas të dhënave të Agjencisë së Statistikave të Kosovës, çmimi mesatar i këtij produkti në shkurtin e vitit të kaluar ishte 1.13 euro.
Një pako prej 900 gramësh sheqer në një dyqan në Prishtinë po shitet për 89 centë. Vitin e kaluar, referuar çmimeve mesatare për muajin shkurt, një kilogram i këtij produkti shitej për 70 centë.
Kurse, çmimi i pesë kilogramëve miell në një dyqan në Prishtinë është 3.85 euro. Sipas të dhënave të Agjencisë së Statistikave të Kosovës, çmimi mesatar i këtij produkti në shkurtin e vitit të kaluar ishte 51 centë për kilogram. /REL/
