Kryetari i Federatës së Basketbollit të Kosovës, Arben Fetahu ka folur pak para fillimit të ‘Final8″ të Kupës së Kosovës.

Fetahu tha se gjithçka tashmë ka përfunduar në aspektin organizativ dhe se pret që të ketë ndeshje të mëdha e me shumë rivalitet, në organizimin që fillon sot.

“Gjithçka është gati dhe se çdo gjë ka shkuar mirë deri më tash. Ne jemi gati për të filluar me spektaklin e madh basketbollist. Rivalitet në parket kemi tash e shumë vite, këto takime janë shumë të rëndësishme dhe të paparashikueshme për shkak se gjithçka varet nga një ndeshje, andaj mendoj që rivaliteti në këtë format do të jetë edhe më i madh“, tha fillimisht Fetahu për ‘GazetaBlic Sport’.

Më pas, ai dha detaje shtesë për tifozët dhe numrin e tyre që do të jenë të pranishëm, ku konfirmoi se kanë marrë pëlqimin e duhur nga Ministria e Shëndetësisë që 30% e tifozëve të lejohen të jenë pjesë e këtij spektakli.

“Kemi pranur një pëlqim nga Ministria e Shëndetësisë që pjesërisht të hapet palestra dhe jemi koordinuar me organizatorin që mos të lejohet asnjë person të futet brenda pa maskë dhe pa qenë plotësisht i vaksinuar. Ne duhet dhe do të respektojmë në plotësi masat e kërkuara dhe të punojmë në atë drejtim që pas një kohe edhe të hapim plotësisht palestrat e basketbollit. Uroj që gjithçka të shkojë mirë dhe që të kënaqemi e të shijojmë këto ditë të mëdha basketbolli”, përfundoi ai.

/GazetaBlic Sport/