Shefi i diplomacisë së Spanjës, Jose Manuel Albares, deklaroi sot se Madridi zyrtar do të mbështesë një “paketë masive dhe të fuqishme” masash ekonomike kundër Rusisë nëse kjo e fundit e sulmon Ukrainën.

Albares theksoi se vendet evropiane kanë burime të tjera përveç fuqisë për të penguar Rusinë nga çdo ndërhyrje ushtarake nga trupat e saj në vendin fqinj, duke përfshirë ato që do të kishin “pasoja të mëdha ekonomike dhe kosto të larta” për Rusinë, raporton Reuters.

“Nuk do të hyj në detaje për sanksionet që mund të vendosin vendet evropiane, për shkak të nevojës për konfidencialitet dhe dëshirës për të ruajtur pasigurinë si një pengesë. Por unë mund t’ju siguroj se do të jetë një paketë e madhe dhe e fuqishme,” tha Albares sot në parlamentin spanjoll.

Ai tha gjithashtu se duket se Rusia është ende e përkushtuar për dialog.

“Ka përshtypje se autoritetet ruse duan që dialogu të mbetet i hapur për momentin, edhe pse nuk është bërë ndonjë përparim konkret”, tha ministri spanjoll.

Spanja sot paralajmëroi qytetarët e saj të mos udhëtojnë drejt Kievit, përveç rasteve emergjente, por njoftoi se nuk do të evakuojë më shumë se 500 qytetarë nga Ukraina, sipas Reuters.