Shtetet e Bashkuara të Amerikës dhe Franca kanë raportuar rritjen më të lartë ditore të rasteve të reja me Covid që nga fillimi i pandemisë, pasi varianti Omicron vazhdon të përhapet.
Sipas Qendrave të SHBA për Sëmundjet dhe Parandalimin (CDC) vendi raportoi më shumë se 440,000 infeksione të reja të hënën.
Sidoqoftë, zyrtarët thanë se numrat mund të jenë një “mbivlerësim” për shkak të vonesave të raportimit gjatë Krishtlindjeve.
Ndërkohë Franca raportoi numrin më të lartë të rasteve të reja ditore në Evropë.
Ajo regjistroi 179,807 infeksione të martën. Ministri francez i Shëndetësisë, Olivier Véran, pati paralajmëruar më herët se Franca mund të shohë deri në 250,000 raste ditore deri në fillim të janarit.
Sidoqoftë, në SHBA, një zëdhënës i CDC i tha faqes së lajmeve Politico se shifra ka të ngjarë të ishte një “mbivlerësim” për shkak të vonesave në mbylljen e qendrave të testimit gjatë periudhës së Krishtlindjes, duke shtuar se numërimi i rasteve “do të bëhet më i qëndrueshëm pas vitit të ri”.
Italia, Greqia, Portugalia dhe Anglia gjithashtu raportuan rritje rekord të martën.
Kjo panoramë vjen pasi Organizata Botërore e Shëndetësisë (OBSH) paralajmëroi se rreziku i variantit Omicron “mbetet shumë i lartë” në përditësimin e saj javor për Covid.
Sipas përditësimit të publikuar të martën, numri i infeksioneve të reja Covid të të gjitha llojeve u rrit me 57% në Evropë në javën para 26 dhjetorit dhe me 30% në rajonin e Amerikës.
Studimet sugjerojnë se varianti Omicron është më i butë se Delta, me një shans 30% deri në 70% më të ulët që njerëzit e infektuar të përfundojnë në spital. Por frika mbetet se numri i madh i rasteve që rrjedhin nga varianti shumë infektiv mund të mposhtin spitalet.
Gjurmuesi i të dhënave të CDC thotë se rastet u rritën me 441,278 më 27 dhjetor, deri tani numri më i lartë i rasteve ditore të raportuara ndonjëherë në agjenci. Mediat amerikane raportojnë se rritja mesatare shtatëditore e infeksioneve tani është në nivelin më të lartë që nga janari 2021.
Sidoqoftë, zyrtarët nga agjencia rishikuan gjithashtu prevalencën e Omicron në SHBA, duke thënë se ai përbën 59% të rasteve në vend të 73% siç ishte raportuar më parë.
Eksperti i politikave mjekësore Scott Gottlieb tha se vlerësimi i ri mund të sugjerojë se një “pjesë e mirë e shtrimeve aktuale në spital” në SHBA janë ende duke u drejtuar nga varianti Delta.
