Deklaratat e zëvendës-ministrit të Drejtësisë, Blerim Sallahu, kanë ngjallur reagime nga Këshilli Prokurorial dhe Prokurori i Shtetit.
Sallahu: Po dëshmohet që vetë prokurorët janë të involvuar në veprime kriminale
Përmes një komunikate të përbashkët, institucionet simotra, i kanë reaguar Sallahut, duke thënë se këto deklarata janë shqetësuese, përcjell GazetaBlic.
Sipas tyre, të njëjtat përmbajnë elemente linçuese, tendencioze, paragjykuese dhe kanë për qëllim dëmtimin e sistemit prokurorial.
Më poshtë edhe komunikata e plotë.
Deklaratë nga Këshilli Prokurorial dhe Prokurori i Shtetit
Prishtinë, 22 tetor 2021 – Këshilli Prokurorial i Kosovës (KPK), është thellësisht i shqetësuar me deklaratat e zëvendësministrit të Drejtësisë, Blerim Sallahu, të bëra përmes një statusi në “facebook”, ku i quan prokurorët kriminel.
Deklaratat e Zëvendësministrit të Drejtësisë janë linçuese, tendencioze, paragjykuese dhe kanë për qëllim dëmtimin e sistemit prokurorial.
Nëse pushteti ekzekutiv nuk distancohet nga deklaratat e tilla do të ndërpritet çfarëdo komunikimi dhe bashkëpunimi ndër-institucional.
Ndërkaq, Prokurori i Shtetit siguron opinionin se do t’i ndërmarrë të gjitha veprimet e nevojshme ligjore lidhur me pretendimet e paraqitura sot në media, dhe çfarëdo shkelje eventuale do të këtë reagime ligjore.
Këshilli Prokurorial i Kosovës si organ i pavarur kushtetues nuk ka lejuar dhe nuk do të lejojë asnjë interferim nga askush për çfarëdo interesi personal, grupor apo politik të cenojë integritetin e sistemit prokurorial.
Me respekt,
Zyra për Komunikim Publik në ZKPSH
/GazetaBlic/
