629 mijë euro janë investuar nga Ministria e Kulturës, Rinisë dhe Sportit për Bibliotekën e Shtimes.

Kështu ka bërë të ditur kryeministri Albin Kurti, i cili bashkë me ministrin e Kulturës, Hajrulla Çeku morën pjesë në përurimin e objektit.

Në një postim në Facebook, shefi i qeverisë thotë se biblioteka i plotëson të gjitha kushtet dhe nevojat e lexuesve dhe është plotësisht e inventarizuar.

“Tjetër përurim, tjetër punë e mbarë. Hapja e dyerve të ndërtesës së re të Bibliotekës së Qytetit në Shtime, është kontribut për arsimin, kulturën e për mbarë shoqërinë e kësaj komune. Ky projekt ka filluar shumë vite më herët, por kishte ngecur nëpër procedura e burokraci. Tashmë pa pengesa, ngecje e punë të lëna në harresë, banorët mund ta gëzojnë një ndërtesë të re dhe moderne e cila plotëson të gjitha kushtet dhe nevojat e lexuesve si dhe është plotësisht e inventarizuar. Biblioteka e re e Shtimes vjen përmes një investimi prej 629 mijë eurosh të Ministrisë së Kulturës, Rinisë dhe Sportit. I ftoj të gjithë qytetarët e Shtimes që këtë objekt të ri ta përdorin sa më shumë, e ta mbajnë aktiv dhe të qasshëm si një vend nga ku do të nisin diskutimet më të mira e do të dalin idetë më të zgjuara të vetëdijes sonë të përbashkët”, ka shkruar Kurti.