Policia e Kosovës ka njoftuar se ka nisur kallëzim penal ndaj një person për lajmërim të rrejshëm, se e ka goditur një veturë në Shtime, raporton Gazeta Blic.
Policia njofton se 36 vjeçari me inicialet M.SH ka shkuar në stacionin policor në Shtime me raport mjekësor, për lëndimet që ka marrë në këmbë nga një automjet VW Golf II.
Pas hetimit të policisë, ka rezultuar i rrejshëm kallëzimi që qytetari ka bërë dhe tani prokurori po heton rastin.
Njoftimi i plotë:
Lajmërimi, apo kallëzimi i rrejshëm i rastit
Me datën 18.06.2022 në ora 10:25, personi me inicialet M.SH ( M/K) i moshës 36 vjeçar kishte raportuar në stacionin policor në Shtime një rast të lëndimit trupor , sipas tij lëndime trupore në këmbë i kishte shkaktuar një automjet VW Golf II , në rrugën ‘’Tahir Sinani‘’ në Shtime, për këtë kishte ofruar edhe raport mjekësor.
Hetuesit policor nga stacioni në Shtime, nën autorizim të Prokurorit të Prokurorisë Themelore në Ferizaj, i kishin marr të gjitha veprimet e nevojshme dhe kishin nisur hetimin .
Pas një pune hetimore për disa ditë, grumbullimit të informacioneve në terren, hetuesit policor kanë arritur që të sigurojnë prova të mjaftueshme materiale dhe deklarative se i dyshuari M.SH, kishte lajmëruar rrejshëm rastin lëndim trupor dhe me datën 13.07.2022 , i njëjti është shoqëruar në stacionin policor në Shtime.
Pas intervistimit nga hetuesit policor, ai në tërësi e ka pranuar veprën dhe me vendim të Prokurorit të rastit, ndaj tij është inicuar kallëzim penal, nën dyshimin se ka kryer vepër penale ‘’ Lajmërimi, apo kallëzimi i rrejshëm’’ me procedurë të rregullt, ndërsa i dyshuari është liruar.
