Lajme

Valdete Idrizi pritet në takim nga drejtuesit e PDK-së të punësuar në Universitetin e Mitrovicës (Foto)

11/10/2017 14:50
nga:M H

Kandidatja e PDK-së për kryetare të komunës së Mitrovicës, Valdete Idrizi, është takuar me profesorët dhe administratën e Universitetit të Mitrovicës, duke politizuar edhe më shumë këtë institucion, shkruan portali Veriu.info.

Nikoqir i takimit ka qenë Alush Musaj, rektori i universitetit të Mitrovicës, i cili në mandatin e Bajram Rexhepit (2007-2009) ishte drejtor i Drejtorisë për Inspeksion në komunën e Mitrovicës dhe njëri prej themeluesve të degës së PDK-së, ku ka ushtruar edhe detyrën e sekretarit të degës së PDK-së në Mitrovicë.

Në këtë takim me karakter politik në prag të zgjedhjeve të balotazhit, ishte prezent edhe menaxheri i Trepçës dhe profesori i Universitetit të Mitrovicës, Ahmet Tmava, i cili për rreth 10 vite ka qenë kryetar i degës së PDK-së në Mitrovicë.

Po ashtu në këtë takim Valdete Idrizin e ka pritur edhe ish kandidati i PDK-së për asambleist në zgjedhjet e 22 tetorit, Alban Fazliu, i cili është përfaqësues i një organizate studentore.

Valdete Idrizi në këtë takim është shoqëruar nga kryetari i degës së PDK-së në Mitrovicë, Avni Kastrati, e i cili është pritur edhe nga ish zëvendësi i tij, përkatësisht ish nënkryetari i komunës së Mitrovicës në mandatin 2009-2013, Rizah Haziri, i cili pas humbjes së PDK-së në zgjedhjet e vitit 2013 është punësuar si shërbyes civil në Universitetin e Mitrovicës, duke ngjallur edhe reagime të oponentëve politik për politizim të UM-së.

Në këtë takim prezent ishte edhe anëtari i Kryesisë së PDK-së dhe ish drejtori i kompanisë rajonale Ujësjellësit, Faruk Hajziri, por nëse nuk është punësuar ndërkohë në Universitet, nuk dihet në çfarë cilësie ka marrë pjesë në takim.

11/20/2017 18:04

Ismaili: Do të fitojmë në Prizren!