Ish-trajneri legjendar i AC Milanit, Arrigo Sacchi, ka deklaruar se Napoli ende mbetet favorit për të fituar titullin e kampionit në Serie A, pavarësisht luhatjeve të fundit të kampionëve në fuqi.

Napoli ka hasur vështirësi në javët e fundit të Serie A, përfshirë edhe humbjen ndaj Udineses gjatë fundjavës, por sipas Sacchit kjo nuk e ndryshon statusin e tyre në garën për titull.

“Milani, Interi dhe Napoli kanë treguar dobësitë e tyre. Asgjë nuk e ndalon Romën të hyjë në garën për Scudetton, ka ende kohë”, ka thënë Sacchi për “La Gazzetta dello Sport”.

“Luhatjet e Contes i shpjegoj kështu: Napoli, kur luan mirë, ka një stil më evropian. Interi, nga ana tjetër, është pak i pasigurt në mbrojtje, edhe pse ka një sulm vdekjeprurës.”

Ndërsa për Milanin, Sacchi theksoi soliditetin, por edhe problemet kundër ekipeve më të vogla.

“Milani është shumë i fortë, por pse ka humbur kaq shumë pikë ndaj skuadrave të vogla dhe të mesme? Ata duhet të punojnë më shumë, sidomos në aspektin mbrojtës”, theksoi Sacchi.

Në fund, Sacchi nuk hezitoi të bëjë edhe parashikimin e tij.

“Napoli mbetet favorit për titullin, përpara Interit dhe Milanit”, përfundoi ai.