Lajme

Rikapitulim pas furtunës së djeshme, Surroi: Qeveria vazhdon punën

03/26/2020 10:53
nga:E Sh

Publicisti Veton Surroi ka komentuar situatën e fundit politike, pas rrëzimit të Qeverisë Kurti.

Ai ka përmbledhur ngjarjet, si çështjen e shpalljes së jashtëzakonshme, taksën e marrëveshjen “sekrete” mes Thaçit e Vuçiqit.

Postimi i tij:

Pra, rikapitulim pas furtunës së djeshme:
1. Qeveria e Kosovës vazhdon punën me të gjithë anëtarët e vet, pos ata të shkarkuar nga kryeministri. Me këtë është pajtuar edhe kryetari i LDK-së.
2. Është evituar shpallja e gjendjes së jashtëzakonshme, një tentim uzurpimi pushteti me pretekst COVID-19.
3. Çështja e taksës 100 për qind tashmë ka hyrë në proces gradual heqje me vendosje të reciprocitetit. Një proces i këtillë është konfirmuar në bisedat që i ka pasur kancelarja Merkel me kryeministrin e Kosovës dhe presidentin e Serbisë. Një proces i këtillë është pranuar nga ana e Serbisë. Kjo tashmë është temë dytësore.
4. Meqë nuk di kush për marrëveshje sekrete Thaçi-Vuçiq, ajo është nule për Kosovën dhe e paqenë për Qeverinë e Kosovës , institucion i vetëm i autorizuar për të zhvilluar negociatat me Serbinë , kur të krijohen kushtet për këtë .Qeveria e Kosovës ka obligim të merret urgjentisht me COVID-2019 .
5. Do të ketë Qeveri të re, sipas procedurave kushtetuese për ta zëvendësuar një Qeveri në dorëheqje (neni 100, pika 6) dhe brenda kushteve të sigurisë së shëndetit publik.