Lajme

PDK kërkon të hiqet taksa pa vendosur reciprocitet

02/27/2020 18:33
nga:Norë Kelmendi

Lideri i PDK’së, Kadri Veseli, kishte marrë një kundërpërgjigje të ashpër nga emisari i Trump për dialogun, Richard Grenell, meqenëse i kishte kërkuar Albin Kurtit që të mos ngutej për ta hequr vendimin për taksë ndaj produkteve me origjinë serbe dhe boshnjake. Sipas Veselit ngutja e kryeministrit nënkuptonte dorëzim para Serbisë.

Megjithatë duket se presioni amerikan ka kryer punë. Tashmë nga kjo parti kërkojnë heqje të taksës pa vendosur fare reciprocitet.

Një gjë të tillë e kërkon një prej zyrtarëve të lartë të PDK’së, Enver Hoxhaj, i cili thotë se edhe ka qenë propozues i vendimit për taksë.

Heqja e taksës është kërkesë e SHBA’së. Richard Grenell e Sekretari Mike Pompeo e kërkojnë heqjen e tarifës 100 % me qëllim të rinisjes së dialogut.

Shkrimi i plotë i Hoxhajt:

Për tarifën

Interesi shtetëror i Kosovës është i pandashëm me interesin nacional të SHBA-së. Qëllimi i jonë është përmbyllja e shtetndërtimit!

Si anëtar i qeverisë që kam propozuar tarifën, sot mendoj që ajo duhet të largohet dhe të mos vendoset as reciprociteti! Tarifa ka qenë mjet dhe jo qëllim! Qëllimi i jonë është anëtarësimi i Kosovës në OKB dhe njohja ndërkombëtare! Tarifa ka qenë goditja jonë ndaj fushatës së Serbisë kundër njohjes së sovranitetit tonë!

Çdoherë i kam besuar Amerikës dhe në asnjë mënyrë nuk duhet ta vëmë në pikëpyetje marrëdhënien e veçantë me partnerin më strategjik tonë dhe aleancën më të shenjtë! Hiqeni taksën dhe mos e vendosni reciprocitetin. Kërkesat dhe qëllimet tona përmbushen me mbështetjen e partnerëve tanë amerikanë e evropianë. Na duhet mençuri dhe vendosmëri për ta ngritë lartë flamurin e Kosovës në OKB, NATO dhe BE!

04/05/2020 19:13

PDK: Kryeministri Kurti u dorëzua para Beogradit në veri – zëvendësi i tij e shpall të ndarë atë pjesë