Shqipëria do të mësojë fatin e saj në Euro 2024 në ndeshjen e fundit të xhiros së tretë që do të jetë determinuese për kalimin tutje ndaj Spanjës.
Kuqezinjtë kanë arkëtuar një pikë aq sa ka edhe Kroacia në vendin e fundit që do të përballet me Italinë që ka 3 pikë në vendin e dytë, transmeton GazetaBlic Sport.
Para ndeshjes me Spanjën ka folur, Nedim Bajrami.
“E dimë të gjithë që Spanja është favorite për fitimin e Europianit. Duhet ta përgatitim mirë ndeshjen dhe të jemi gati. Të bëjmë maksimumin të gjithë, nuk ka rëndësi kush luan dhe kush jo.
Me Italinë as vetë nuk e pritëm që do e fillonim aq mirë, por ata shënuan dy gola më pas. Patëm rast me Manajn për të barazuar. Me Kroacinë zhvilluam një ndeshje shumë të bukur, treguam që jemi aty.
Spanja ka kualitete, nuk ka rëndësi kush luan nga ata. Ne të fokusohemi te loja jonë dhe kualitetet tona. Dhe të japim maksimumin. Lamine Yamal është shumë i fortë, por edhe Morata e Fabian Ruiz. Ndërkohë që Rodri nuk luan, pasi ka dy kartonë të verdhë.
E dimë që Spanja është jo vetëm ekip i fortë, por favorit për mua për fitimin e Europianit. Të japim maksimumin dhe t’i japim gola rastet që do të kemi. Është një turne që nuk ka shumë raste, të jemi më konkretë te shënimi i golit.
Pozicioni? Ndaj Italisë luajta mesfushor, me Kroacinë në krah. Sylvinho më pyeti nëse mund të luaja në krah. I thashë po, pasi jam gati të luaj e sakrifikoj kudo për Kombëtaren.
Në futboll nuk ka dhurata, kështu që të fokusohemi te loja jonë dhe kualitetet që kemi. Të luftojmë për çdo top.
Goditjet në portë? Do të provoj edhe me Spanjën. Edhe Asani e Asllani kanë goditje shumë të mira. Spanja do të na vendosë në presion, kështu që të shfrytëzojmë edhe goditjet nga zona e 16 metrave.
Jam gati të luaj në çdo pozitë, mesfushë apo krah. Do të jap maksimumin ku të më vendosë trajneri. Do kemi rastet tona në kundërsulm, por të jemi më konkretë. Patëm raste edhe me Italinë e Kroacinë. Me Spanjën duhet t’i bëjmë gola
Goli me Italinë? Më mirë kisha dhënë golin e fundit me Italinë që të fitonim 1-0. Nuk e dija se u futa në historinë e Europianit, jam shumë i lumtur.
Rotacion te Spanja? Po luajmë një Europian me skuadra shumë të forta. Nuk ka ekip të parë, të dytë apo të tretë për mua. Të gjithë kanë kualitet, por ne duhet të përgatitemi sa më mirë. Të futemi në ndeshje për të luftuar për çdo pikë dhe çdo top.
Besoj se fazën mbrojtëse kemi bërë dy ndeshje të mira. Por të jemi më konkretë në sulm, pasi kemi patur raste. Duhet të kërkojmë edhe golin e dytë dhe të tretë, jo vetëm 1-0.
Tifozët? Spanja do të na bëjë shumë presion, kështu që në mbrojtje të jemi si ndaj Italisë dhe Kroacisë. Kemi kualitete në kundërsulm. Shpresoj që të gjithë tifozët kuqezi do të na mbështesin, në stadium dhe jashtë.
Presioni? Presion nuk kemi më, është ndeshja e tretë. Ne nuk jemi Spanja apo Franca, që kemi shumë raste. T’i bëjmë gola ato rastet që kemi. Është një arritje e madhe t’i shënojmë dy gola Kroacisë dhe gol Italisë.
Besoj se të gjithë e dimë ndeshjen me Serbinë, por nuk dua të futëm aty. Ndeshja më e bukur ishte me Çekinë atje. Jo sepse shënova unë, por gjithë ata tifoza, ishte shumë bukur. Edhe ndeshja me Portugalinë kur shënoi Balaj“, përfundoi Bajrami.
Ndeshja ndaj Spanjës do luhet të hënën me fillim nga ora 21:00.
